Nan jou kite 4 Janvye 2026 lan, vil Okap te temwen yon moman kiltirèl ki ra e istorik lè rapè Fantom te òganize yon gwo pwogram mizikal dirèkteman nan lari a. Evènman sa a te transfòme espas piblik la an yon veritab sèn ouvè, kote rap kreyòl la te reyini pèp la san baryè ni distans.
Malgre lapli ki t ap tonbe pandan aktivite a, foul moun yo te rete fidèl ak evènman an. Anpil jèn, fanatik mizik, ak sitwayen senp te rasanble an mas, chante, danse, epi viv chak moman ak entansite. Prezans sa a te konfime yon reyalite klè: rap kreyòl la se pa sèlman mizik, li se yon vwa, yon rezistans, ak yon ekspresyon dirèk de lavi pèp ayisyen an.
Sou sèn nan, Fantom, kòm atis prensipal, te pote enèji ak mesaj ki fè repitasyon li. Li te akonpaye pa plizyè lòt atis ayisyen ki te kontribye nan siksè evènman an, pami yo Atros, Dutty, Cator, Watson G, Kenfs, Maximin, Zogarwata, Percutan, ansanm ak Franco Love. Chak atis te pote pwòp stil li, pwòp pawòl li, sa ki te bay pwogram nan yon richès mizikal ak kiltirèl remakab.
Chwa pou òganize yon evènman konsa nan lari a pa t o aza. Nan yon kontèks kote espas kiltirèl yo vin limite, inisyativ sa a voye yon mesaj fò: mizik la dwe rete aksesib, kole ak reyalite pèp la. Lari a te vin tounen sèn, epi piblik la te vin tounen aktè prensipal nan selebrasyon rap kreyòl la.
Avèk pwogram sa a, Fantom ranfòse imaj li kòm youn nan poto mitan rap kreyòl ayisyen an. Evènman Okap la montre klèman ke, malgre defi yo, kilti ayisyen an kontinye viv, kreye, epi fè listwa — menm anba lapli.
